जामनेरात आयपीएल सट्ट्यावर एलसीबीचा मोठा छापा; १० लाखांच्या मुद्देमालासह चौघांना बेड्या!
जामनेर (प्रतिनिधी):आयपीएल क्रिकेट मॅचच्या नावाखाली ऑनलाईन सट्टा लावणाऱ्या टोळीचा स्थानिक गुन्हे शाखेने (LCB) पर्दाफाश केला आहे. जामनेर शहरातील हिवरखेडा रोड परिसरातील एका घरावर टाकलेल्या छाप्यात पोलिसांनी १० लाख ५३ हजार ८०० रुपयांचा मुद्देमाल जप्त केला असून, याप्रकरणी चार जणांविरुद्ध गुन्हा दाखल करण्यात आला आहे.
नेमकी घटना काय?
सध्या सुरू असलेल्या आयपीएल क्रिकेट सामन्यांवर काही लोक ऑनलाईन सट्टा लावून जुगार खेळत असल्याची गोपनीय माहिती स्थानिक गुन्हे शाखेला मिळाली होती. या माहितीच्या आधारे हिवरखेडा रोडवरील एका संशयास्पद घरावर पोलिसांनी अचानक छापा टाकला. या कारवाईत आरोपी रंगेहाथ सट्टा खेळताना आणि खेळवताना आढळून आले.
असा मिळाला मुद्देमाल:
पोलिसांनी केलेल्या या धडक कारवाईत मोठा ऐवज हस्तगत करण्यात आला आहे, ज्यामध्ये:
रोख रक्कम: ९,०२,३०० रुपये.
मोबाईल: १,३०,००० रुपये किमतीचे विविध कंपन्यांचे फोन.
इलेक्ट्रॉनिक वस्तू: २५,००० रुपये किमतीचा टीव्ही आणि साउंड बार.
इतर: ४१ एटीएम कार्ड्स आणि सट्ट्याशी संबंधित इतर साहित्य.
एकूण जप्त मुद्देमाल: १०,५३,८०० रुपये.
या आरोपींना ठोकल्या बेड्या:
या कारवाईत पोलिसांनी १) देवानंद सुभाष सोनवणे, २) रितेश अशोक नेरकर, ३) परीक्षेत रवींद्र पाटील आणि ४) प्रवीण जगन्नाथ टहाकडे (सर्व राहणार जामनेर) यांना ताब्यात घेतले आहे.
