जामनेर : तालुक्यात सुरू असलेल्या कथित अवैध वाळू वाहतुकीच्या पार्श्वभूमीवर महसूल विभागाने अखेर कारवाईस सुरुवात केली आहे. नायब तहसीलदार इंगळे यांच्या नेतृत्वाखालील महसूल पथकाने कारवाई करत एक डंपर जामनेर पोलीस ठाण्यासमोर पकडल्याची माहिती समोर आली आहे. तर दुसऱ्या डंपरचा पथकाने पाठलाग केल्याचे सांगण्यात येत आहे.
मिळालेल्या प्राथमिक माहितीनुसार, महसूल पथक अवैध वाळू वाहतुकीविरोधात कारवाई करत असताना एका डंपरला ताब्यात घेण्यात आले. दरम्यान, आणखी एका डंपरने कारवाई टाळण्याचा प्रयत्न केल्याने महसूल पथकाने त्याचा पाठलाग केला. या पाठलागादरम्यान महसूल विभागाच्या वाहनावर दगडफेक तसेच पथकातील कर्मचाऱ्यांशी शिवीगाळ झाल्याची माहिती समोर आली आहे. मात्र, या घटनेबाबत अधिकृतपणे नेमकी माहिती अद्याप समोर आलेली नाही.
तालुक्यात अवैध वाळू वाहतुकीबाबत यापूर्वीही चर्चा आणि तक्रारी होत असल्याच्या पार्श्वभूमीवर महसूल विभागाच्या या कारवाईकडे आता विशेष लक्ष लागले आहे. त्यामुळे संबंधित वाहतूकदारांवर पुढील काळात कोणती कारवाई केली जाते, तसेच अवैध वाळू वाहतुकीला आळा घालण्यासाठी प्रशासनाकडून कोणती ठोस पावले उचलली जातात, याकडे नागरिकांचे लक्ष आहे.
दरम्यान, या संपूर्ण कारवाईबाबत अधिकृत माहिती जाणून घेण्यासाठी तहसीलदारांशी संपर्क साधण्याचा प्रयत्न करण्यात आला. मात्र, त्यांच्याशी संपर्क होऊ शकला नाही. त्यामुळे डंपरवरील कारवाई, पाठलागादरम्यान घडलेली घटना आणि पुढील प्रशासकीय कारवाईबाबत अधिकृत भूमिका अद्याप स्पष्ट झालेली नाही.
या प्रकरणात महसूल विभागाकडून अधिकृत माहिती किंवा पंचनामा समोर आल्यानंतरच घटनेचे नेमके स्वरूप स्पष्ट होणार आहे.
About the Author
